Кондак 1
Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея «Державныя». Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти:
Радуйся, Мати Божия Державная, Заступнице усердная рода христианскаго.
Икос 1
Ангелом радость приимшая, благоволила еси, Владычице, возвестити старице благочестивей радость о явлении иконы Твоея честныя «Державныя», юже и обретше по указанию Твоему, яко знамение милости Божией к нам, грешным, благодарственно вопием Ти сице:
Радуйся, воли Господней тайны нам открывающая;
Pадуйся, гнев Его праведный, на ны движимый, умягчающая.
Радуйся, зловерия нечестивых обличение;
Pадуйся, гордыни их низложение.
Радуйся, веры христианския утверждение;
Pадуйся, почитания святых икон освящение.
Радуйся, тихое пристанище спасения душ наших;
Pадуйся, Всемилостивая Заступнице наша у престола Святыя Троицы.
Радуйся, от бед и скорбей наше избавление;
Pадуйся, Церкве Православныя утверждение.
Радуйся, звездо невечерняго света, нас озаряющая;
Pадуйся, Матерь Света, всех просвещающая.
Радуйся, Мати Божия Державная, Заступнице усердная рода христианского.
Кондак 2
Видящи, Всенепорочная, с высоты небеснаго жилища Своего, идеже с Сыном Твоим во славе пребываеши, скорбь верных рабов Твоих, яко гневнаго ради Божия посещения вера Христова поругаема бывает нечестивым зловерием, благоволила еси явити нам икону Твою «Державную», да вси христолюбивии людие усердно молятся пред нею, вопиюще Богу: Аллилуиа.
Икос 2
Разуму нашему просвещение свыше исходатайствуй, Пресвятая Богородице, да познаем, что есть воля Божия благая, угодная и совершенная, и сердце направи, еже со усердием творити ю, Тебе же, Всемилостивая Заступнице, непрестанными гласы восхваляти:
Радуйся, явлением честныя иконы Твоея тьму лютых обстояний от нас отгоняющая;
Pадуйся, лучами чудес всех просвещающая.
Радуйся, душевными и телесными очами ослепших прозрение;
Pадуйся, омраченных смыслов просвещение.
Радуйся, всех христиан вожделенная Помощнице;
Pадуйся, всех уповающих на Тя непостыдная надеждо.
Радуйся, вдов и сирот надежный покрове;
Pадуйся, алчущих Питательнице.
Радуйся, духовных сокровищ Подательнице;
Pадуйся, богомудрых премудрая доброто.
Радуйся, пресветлая, Божественная красото;
Pадуйся, обоняние Христова благоухания.
Радуйся, Мати Божия Державная, Заступнице усердная рода христианскаго.
Кондак 3
Силу Божественныя благодати даруй нам, Пресвятая Богородице, во еже неуклонно и непреткновенно ходити нам спасительным путем Христовых заповедей, сердцем же и устами непрестанно воспевати Всемогущему Богу: Аллилуиа.
Икос 3
Имуще Тя, Богоизбранная Заступнице рода христианскаго, яко зарю светлую, просвещающую душ наших темноту и разгоняющую мрак сердечнаго неведения нашего, припадаем к честней иконе Твоей «Державней» и с умилением вопием Ти сице:
Радуйся, сохраняти и спасати всех призывающих Тя обещавшая;
Pадуйся, прославляющих Тя прославляющая.
Радуйся, к Сыну Твоему и Богу нашему молитвы верных приносящая;
Pадуйся, благодать Твою иконам Твоим честным даровавшая.
Радуйся, всю вселенную лучами Твоея благодати озарившая;
Pадуйся, премудрости Божия приятелище.
Радуйся, Божественныя благодати Подательнице;
Pадуйся, яко Тобою от вечныя смерти свобождаемся.
Радуйся, яко Тобою безконечныя жизни сподобляемся;
Pадуйся, честнейшая Херувим и славнейшая Серафим.
Радуйся, Матерь Света и Царице Небесная;
Pадуйся, Владычице, Всемилостивая за нас пред Богом Заступнице.
Радуйся, Мати Божия Державная, Заступнице усердная рода христианскаго.
Кондак 4
Буря житейскаго моря сокрушает духовный корабль наш волнами мирских попечений, и мир убогих душ наших мятется. И где обрящем тихое пристанище спасения? Токмо на Тя возлагаем надежду, Владычице; имущи бо державу непобедимую, от всяких бед, глада, скорбей и болезней избави нас, верно вопиющих Богу: Аллилуиа.
Икос 4
Слышавше православнии людие повеление Твое, Владычице, молитися пред образом Твоим «Державным», со умилением сердечным прибегают к Твоему всесильному заступлению у престола Всемогущаго Бога и благоговейно вопиют Ти сице:
Радуйся, горняго мира украшение;
Pадуйся, дольняго мира заступление.
Радуйся, Дщи благословенная Отца Небеснаго;
Pадуйся, Родительнице неискусомужная Сына Предвечнаго.
Радуйся, демонския полки побеждающая;
Pадуйся, враги спасения человеческаго посрамляющая.
Радуйся, яко волею Твоею сокрушаются еретические главы;
Pадуйся, яко вернии Тобою сподобляются славы.
Радуйся, телес наших безмездная Целительнице;
Pадуйся, душ наших к Царствию горнему Путеводительнице.
Радуйся, яко сотвори Тебе величие Сильный;
Pадуйся, яко призре на смирение Твое Господь.
Радуйся, Мати Божия Державная, Заступнице усердная рода христианскаго.
Кондак 5
Боготечная звезда явися нам, Владычице, честная Твоя икона «Державная», страну Российскую всю обтекающая и лучами чудес Твоих осиявающая всех блуждающих по морю страстнаго жития, мрак печалей и мглу всяческих недуг и скорбей прогоняющая и наставляющая на путь спасения с верою к Тебе притекающих и вопиющих Богу: Аллилуиа.
Икос 5
В дни лютых скорбей и злых обстояний явила еси нам, Владычице, велию милость обретением честныя иконы Твоея «Державныя», да вси с верою молящиися пред нею приимут здравие и душ спасение. Сего ради и мы, прославляюще Твое милосердие неизреченное, усердно вопием Ти сице:
Радуйся, светило незаходимое, светом истиннаго богопознания нас просвещающее;
Pадуйся, Вратарнице, двери райския верным отверзающая.
Радуйся, многотекущая река Божественныя благодати;
Pадуйся, неистощимый источниче святыни.
Радуйся, ко благочестию наша Наставнице;
Pадуйся, душ наших освящение.
Радуйся, кающихся грешников с Богом примирение;
Pадуйся, добрыя обеты приемлющая.
Радуйся, благим намерениям способствующая;
Pадуйся, злыя начинания разрушающая.
Радуйся, вражия козни расторгающая;
Pадуйся, скорая человеком Помощнице.
Радуйся, Мати Божия Державная, Заступнице усердная рода христианскаго.
Кондак 6
Воспеваем Твое милосердие досточудное и многое к нам снисхождение, Пресвятая Богородице, не престаеши бо молитися о нас, грешных, Сыну Твоему и Богу нашему, еже отвратити гнев Его праведный, на ны движимый, и помиловати всех верно вопиющих Богу: Аллилуиа.
Икос 6
Возсиявает в души наша, омраченныя скорбию и унынием от множества согрешений, свет благодатнаго утешения, и сердце наше исполняется веселия и радости, егда непрестанными Твоими, Владычице, вразумлениями возбуждаеши нас вопити к щедрому Богу, да милостив будет и простит нам прегрешения наша. Не премолчи убо, Владычице, наставляющи и вразумляющи нас, зовущих Ти сице:
Радуйся, в скорбех и болезнех долготерпению нас научающая;
Pадуйся, вся помышления наша к распятому за грехи мира Спасителю устремляющая.
Радуйся, страдания Его и крестную смерть в памяти нашей обновляющая;
Pадуйся, правосудием Божиим к ожесточенным и нераскаянным нас устрашающая.
Радуйся, ожиданием будущих небесных благ нас услаждающая;
Pадуйся, к наследству нетленному и вечному нас приводящая.
Радуйся, наследниками Царствия Божия нас сотворяющая;
Pадуйся, трапезо святая, хлебом жизни нас питающая.
Радуйся, маслине благоплодная, елеем милости сердца умягчающая;
Pадуйся, яко молитвою пред иконою Твоею приемлем духовное утешение.
Радуйся, яко сердцам нашим даруеши благодатное сокрушение;
Pадуйся, яко благостынею Твоею угашаеши в нас огнь нечестия.
Радуйся, Мати Божия Державная, Заступнице усердная рода христианского.
Кондак 7
Хотяй всем человеком спастися и в разум познания истины приити, премилосердный Господь и Создатель наш посла во дни гневнаго посещения Своего ангела пресветла в новоявленнем образе Твоем «Державном», да вси с верою молящиися пред ним, приимут помощь и заступление Твое всесильное и радостно вопиют Всемогущему Богу: Аллилуиа.
Икос 7
Новую показа милость всех Творец и Владыка наш Господь, егда положи во гневе Своем наказати род человеческий огнем, мечем, гладом и болезньми, сотвори сие наказание для многих человеков ко вразумлению и исправлению во спасение душ. Сего ради и мы, Владычице, припадающе к Пречистому образу Твоему «Державному», усердно молим Тя: не даждь нам погибнути до конца, но милосердия двери отверзи нам, вопиющим Ти сице:
Радуйся, неприступнаго Божества селение;
Pадуйся, ангельское непрестающее удивление.
Радуйся, рабов Божиих тайное вразумление;
Pадуйся, Заступнице всех сущих в скорбех и болезнех.
Радуйся, благодатное безстрастие ищущим его подающая;
Pадуйся, всех в чистоте целомудрия живущих зело любящая.
Радуйся, пристанище небурное подвижников благочестия;
Pадуйся, гневом Божиим вразумляющая сынов нечестия.
Радуйся, безмолвствующих сладкая Собеседнице;
Pадуйся, отшельников Христа ради крепкое упование.
Радуйся, постников Божественное радование;
Pадуйся, пустынножителей тихое веселие.
Радуйся, Мати Божия Державная, Заступнице усердная рода христианскаго.
Кондак 8
Странни и пришельцы есмы на земли сей: житие бо наше суетно и маловременно есть. Мы же смерти безвестное во ум никогдаже приемлем, ни помышляем о Страшнем судищи Христове, в немже имамы праведному Судии предстати и дати ответ о всяком же деле и слове. Темже молим Тя, Владычице: возбуди нас скоро от сна греховнаго, да не постигнет нас час смерти неисправленных и да сподобимся Твоим ходатайством получити беззакониям нашим прощение и во гласе радования воспевати Христу Богу: Аллилуиа.
Икос 8
Вся бывши горе, к небесным взята еси и земных не оставляеши, Пресвятая Богородице, священным Твоим предстательством: имаши бо дерзновение к Сыну Твоему и Богу нашему. Темже утверди, Владычице, в мире глубоце страну нашу православную и вся полезная даруй рабом Твоим, да величающе воспеваем Ти тако:
Радуйся, умным очесем нашим горький и страшный час смертный представляющая;
Pадуйся, на кийждо день, аки уже на последний жития нашего, взирати нас научающая.
Радуйся, любити мир и яже в мире нам воспрещающая;
Pадуйся, пристрастие к тленному богатству из сердца нашего искореняющая.
Радуйся, вся блага земная быти привременна и скоропреходяща нам показующая;
Pадуйся, славы человечи, аки тени преходящия, искати нам возбраняющая.
Радуйся, яко сладчайшее имя Господа Иисуса Христа устами непрестанно произносити и во уме держати нас побуждаеши;
Pадуйся, яко от празднословия, многоглаголания, паче же от кощунства нас удержаваеши.
Радуйся, яко воздержанию в пищи и питии приобучити нас печешися;
Pадуйся, яко Твое за нас ходатайство сильно есть пред Богом, еже не вверженным нам быти во тьму кромешнюю.
Радуйся, яко присно внушаеши нам омывати грехи своя слезами покаяния, да избавимся геенны адския;
Pадуйся, яко побуждаеши нас день и нощь молитися, да не посланы будем со демоны мучитися.
Радуйся, Мати Божия Державная, Заступнице усердная рода христианскаго.
Кондак 9
Всякое естество ангельское удивися делу Твоего милосердия, Господи, яко даровал еси нам толико твердую и теплую Заступницу роду христианскому во дни гневнаго Своего посещения, нам невидимо сопребывающую, слышащую же Тебе поющих: Аллилуиа.
Икос 9
Ветии многовещаннии, непросвещеннии светом истиннаго богопознания, поклонишася златому тельцу. По слову же апостола, всяк любостяжатель есть идолослужитель. Сего ради Божие гневное посещение всему миру зряще, и мы, грешнии, смиренно молим Тя, Владычице: умилостиви Создателя, да потщится гнев Свой праведный преложити на милость и помиловати нас, вопиющих Ти сице:
Радуйся, яко Твоея помощи и заступления никогдаже нас лишаеши;
Pадуйся, яко ум наш, омраченный небрежением, светлым Твоим покровом озаряеши.
Радуйся, яко Тобою от страстей телесных избавляемся;
Pадуйся, яко Тобою сладостей духовных исполняемся.
Радуйся, твердое Православия укрепление;
Pадуйся, честное Пресвятыя Троицы носило и похваление.
Радуйся, и во временней жизни полезная нам подающая;
Pадуйся, душевныя раны наша елеем спасительным умащающая.
Радуйся, яко из рова беззаконий наших рукою Твоея помощи нас исхищаеши;
Pадуйся, яко греховный сон душевредныя нашея лености отрясаеши.
Радуйся, душевное умиление и сердечное сокрушение в нас раждающая;
Pадуйся, яко твориши всем спастися, в державный покров Твой прибегающим.
Радуйся, Мати Божия Державная, Заступнице усердная рода христианскаго.
Кондак 10
Спасти хотя многия люди от обдержащих их скорбей и болезней и веру их утвердити во всесильное заступление Твое, Владычице, даровала еси нам изображение честныя иконы Твоея «Державныя», да вси, видяще являемую Тобою милость, вопиют со умилением Богу: Аллилуиа.
Икос 10
Стена явилася еси, Богородице Дево, Российстей стране честными Твоими иконами, изливающи чудеса во бранех и осеняющи благодатною помощию Твоею христолюбивых воинов. Под державным бо покровом Твоея благости Российская страна созидашеся, и врата адова не одолеша Православныя Церкве Христовы. Сего ради припадающе к честней иконе Твоей «Державней», радостно вопием Ти сице:
Радуйся, Российския страны покрове и утверждение;
Pадуйся, от нашествия иноплеменных избавление.
Радуйся, сущих в пленении свобождение;
Pадуйся, от глада и болезней наше спасение.
Радуйся, саде земли обетования;
Pадуйся, цвете Божественнаго саждения.
Радуйся, лозо добродетельная винограда Христова;
Pадуйся, древо чудоточное рая Иисусова.
Радуйся, жилище и дом Христа Бога нашего;
Pадуйся, вместилище неизреченныя Его славы.
Радуйся, Владычице, Всемилостивая Подательнице щедрот;
Pадуйся, яко много может молитва Твоя пред Сыном Твоим и Богом нашим.
Радуйся, Мати Божия Державная, Заступнице усердная рода христианскаго.
Кондак 11
Пение хвалебное и благодарственное приносим Ти, Владычице, под державным бо покровом Твоея благости пребываем в непостыдней надежде всесильнаго заступления Твоего за нас, грешных, и все упование наше на Тя возложивше, радостно вопием Богу: Аллилуиа.
Икос 11
Светильницы наши угасоша, елея же благих дел не имамы, во еже возжещи благодать Духа Святаго. И где обрящемся, окаяннии, сном греховным отягченнии, егда постигнет нас внезапу в полунощи час кончины нашея? Но да не услышим и мы, якоже юродивыя девы, грознаго гласа Жениха: не вем вас! Помози нам, Владычице, наполнити сосуды душ наших елеем благих дел, паче же милосердия и смирения, да благодарственно воспоем Ти сице:
Радуйся, яко воспоминанием грядущаго грознаго суда Божия от грехов нас отреваеши;
Pадуйся, яко души наши, аки невесту, ко сретению прекраснаго Жениха Христа предуготовляти нас поучаеши.
Радуйся, яко возбуждаеши нас на всяк день же и час приносити Христу Богу молитвы, прошения и благодарения;
Pадуйся, яко с мудрыми девами, душами праведных, внити в брачный чертог Сына Твоего и Бога нашего помогаеши.
Радуйся, яко в ризу непорочности и чистоты облещися нам способствуеши;
Pадуйся, яко стати нам на Страшнем суде Христово одесную Его ходатайствуеши.
Радуйся, яко благоутробие Божие о причастии нас лику избранных умоляеши;
Pадуйся, яко ум наш, омраченный небрежением, светом Своим озаряеши.
Радуйся, яко голубину простоту и агнчу кротость стяжати нам приискренне желаеши;
Pадуйся, яко самоотвержению и отречению от злыя нашея воли приобучити нас тщишися.
Радуйся, яко младенческое незлобие даровати нам способствуеши;
Pадуйся, яко хладное сердце наше молитвами воспламеняти нам помогаеши.
Радуйся, Мати Божия Державная, Заступнице усердная рода христианскаго.
Кондак 12
Благодать прияла еси, Владычице, от Всемогущаго Господа Бога миловати благочестивых чад Церкве Христовы и вразумляти нечестивых сынов ея. Сего ради, притекающе под державный покров Твоея благости, усердно молим Тя, Владычице: избави нас от ухищрений духов злобы, разслабляющих наши душу и тело леностию и нерадением, и возбуди нас от сна греховнаго, да благодарственно вопием Богу: Аллилуиа.
Икос 12
Поюще Твоя чудеса, бывшая в древняя и настоящая времена, хвалим Тя, Владычице, яко живоносный источник благодати и неистощимую чудес реку, бездну бо милости и щедрот даровала еси роду христианскому явлением честных икон Твоих. Сего ради и мы, припадающе к честней иконе Твоей «Державней», со умилением вопием Ти сице:
Радуйся, Церкве Небесныя и земныя украшение;
Pадуйся, девства честный покрове и ограждение.
Радуйся, светлое пророческое сбытие;
Pадуйся, всехвальных апостолов восхваление.
Радуйся, честная похвало иереев благоговейных;
Pадуйся, молние, неверных устрашающая.
Радуйся, славою чудес Твоих верных смыслы озаряющая;
Pадуйся, печаль и скорбь нашу в радость претворяющая.
Радуйся, яко молиши Сына Твоего и Бога нашего всем нам спастися;
Pадуйся, яко твориши милости всем в державный Твой покров притекающим.
Радуйся, Заступнице всех сущих в скорбех и болезнех;
Pадуйся, всем с верою Тебе молящимся полезная дарующая.
Радуйся, Мати Божия Державная, Заступнице усердная рода христианскаго.
Кондак 13
О всепетая Мати, Державная Владычице! Приими ныне сие малое моление наше и величия ради благости Твоея и неизреченных щедрот Твоих не помяни множества грехов наших, но исполни во благих прошения наша: даруй нам вся потребная к жизни и благочестию, избави нас от глада, болезней и печали, и Царствия Небеснаго наследники всех сотвори, верно вопиющих Богу: Аллилуиа.
Этот кондак читается трижды, затем икос 1 и кондак 1
Молитва Пресвятой Богородице перед Ея иконой, именуемой «Державная»
О, Державная Владычице Пресвятая Богородице, на объятиях Своих держащая Содержащаго всю вселенную Царя Небеснаго! Благодарим Тя за неизреченное милосердие Твое, яко благоволила еси явити нам, грешным и недостойным, сию святую и чудотворную икону Твою во дни сия лукавыя и лютыя, яко вихрь, яко буря внутренняя нашедшая на страну нашу, во дни уничижения нашего и укорения, во дни разорения и поругания святынь наших от людей безумных, иже не точию в сердце, но и устнами дерзостно глаголют: несть Бог: и в делех сие безбожие показуют. Благодарим Тя, Заступнице, яко призрела еси с высоты святыя Своея на скорби наша и горе нас православных, и яко солнце светлое, увеселяеши изнемогшия от печали очеса наша пресладостным зрением Державного образа Твоего. О, Преблагословенная Мати Божия, Державная Помощнице, крепкая Заступнице! Благодаряще Тя со страхом и трепетом, яко раби непотребнии, припадаем Ти со умилением, с сокрушением сердечным и со слезами, и молим Тя и стеняще вопием Ти: спаси нас, спаси! Помози нам, помози! Потщися: погибаем! Се живот наш аду приближися: се обышедше обыдоша нас греси мнози, беды мнози, врази мнози. О, Небесная Царице! Скипетром власти Твоея Божественныя разсей, яко прах, яко дым, нечистивыя козни врагов наших видимых и невидимых: сокруши велеречивыя помышления их и запрети им: и яко Мати всех, на путь правый и богоугодный настави их. Вкорени в сердца всех нас правду, мир и радость о Дусе Святе: водвори в стране нашей тишину, благоденствие, безмятежие, любовь друг ко другу нелицемерную. Державою Твоею всесильною удержи, Пречистая, потоки беззакония, хотящия потопити Землю Русскую в страшней пучине своей. Поддержи нас слабых, малодушных, немощных и унылых, укрепи, возстави и спаси: яко да под Державою Твоею всегда храними, поем и величаем Пречестное и Великолепое имя Твое, ныне и присно и во веки веков. Аминь.
Молитва иная
О мира Заступнице, Мати Всепетая! Со страхом, верою и любовию припадающе пред честною иконою Твоею Державною, усердно молим Тя: не отврати лица Твоего от прибегающих к Тебе. Умоли, милосердная Мати Света, Сына Твоего и Бога нашего, Сладчайшего господа Иисуса Христа, да сохранит в мире страну нашу, да утвердит державу нашу в благоденствии и избавит нас от междоусобныя брани, да укрепит святую Церковь нашу Православную, и непозыблему соблюдет ю от неверия, раскола и ересей. Не имамы бо иныя помощи, разве Тебе, Пречистая Дево: Ты еси всесильная христиан Заступница пред Богом, праведный гнев Его умягчающая. Избави всех, с верою Тебе молящихся, от падений греховных, от навета злых человек, от глада, скорбей и болезней. Даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарна воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя в Троице славимаго Бога: Отца, Сына и Святаго Духа. Аминь.
Тропарь Пресвятой Богородице перед Ея иконой, именуемой «Державная»
Тропарь, глас 8:
Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей «Державней», и светозарный луч славы чудес Твоих да нисходит от Нея на всех с верою Тебе молящихся и вопиющих Богу. Аллилуиа.
Тропарь, глас 4
Заступнице верных преблагая и скорая, Пречистая Богородице Дево! Молим Тя пред святым и чудотворным образом Твоим, да якоже древле от него заступление Твое граду Москве даровала еси, тако и ныне нас от всяких бед и напастей милостивно избави и спаси души наша, яко милосердая.
Ин. Тропарь, глас 4:
Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.
Кондак, глас 2
В небесныя обители преселившаяся с плотию, сущия на земли никакоже оставила еси, Богородице, образ божественный и многочудесный Пречистаго лица Твоего зрети любящым Тя и покланятися даровала еси. Яко знамение Твоея благодати, чтим его, лобызающе.
Кондак, глас 8
Взбранной Воеводе победительная песни приносим, яко даровася нам держава Твоя, и ничесоже устрашимся, не от мира бо спасение наше, но превознесенныя Владычицы милосердием ограждаемся и тому днесь радуемся, яко прииде Заступнице на стражу земли Своея.
Ин. Кондак, глас 8
Избранной от всех родов Заступнице рода христианскаго, покровом Своея благости покрывающей страну нашу православную, благодарственныя пения приносим Ти, Владычице, о явлении нам чудныя иконы Твоея «Державныя». Ты же, яко всемилостивая Заступница всех, с верою к Тебе притекающих, от всяких нас бед свободи, да зовем Ти: радуйся, Матерь Божия Державная, Заступнице усердная рода христианскаго.
Величание
Величаем Тя, Пресвятая Дево, Богоизбранная Отроковице, и чтим Державный образ святыни Твоея, имже подаеши велию милость всем, с верою к нему притекающим.